Moska zyrtare ka njoftuar të premten se është e hapur për dialog me vendet evropiane, por nuk do të pranojë ultimatume, teksa po shtohen sinjalet se Bashkimi Evropian mund të kërkojë bisedime me Rusinë pas shmangies së kontakteve që nga fillimi i luftës në Ukrainë. Zëdhënësi i Kremlinit, Dmitry Peskov, tha se logjika e dikton nevojën për kontakte të tilla, por theksoi se vendet evropiane duhet të ndryshojnë qasjen e tyre ndaj Rusisë. “Evropianët kanë një keqkuptim shumë serioz. Ata supozojnë se negociatat me Rusinë duhet të zhvillohen nga një pozicion force dhe duke u mbështetur në dobësinë e Rusisë. Ky është gabimi më i madh. Një qasje e tillë nuk do të çojë askund. E vërtetë, kemi shumë gjëra për të diskutuar, por duhet ndryshuar mënyra se si po e trajtojnë Rusinë”, u tha ai gazetarëve. Presidenti rus, Vladimir Putin, ka deklaruar se është i gatshëm për bisedime me qeveritë evropiane, por se hapi i parë duhet të vijë prej tyre, pasi sipas tij ishin vendet evropiane ato që ndërprenë marrëdhëniet me Moskën.