Serbia mund ta përsërisë agresionin terrorist në Kosovë, nëse nuk ndëshkohet për sulmin e vitit të kaluar në Banjskë, sipas Kryetarit të Kuvendit të Kosovës, Glauk Konjufca. “Si një nga shtetet që nuk e ka mbështetur sanksionimin e Rusisë për luftën pushtuese në Ukrainë dhe vazhdon të kultivojë bashkëpunim ushtarak me Rusinë, Serbia duhet të shihet si rrezik jo vetëm në Kosovë, por për krejt paqen dhe stabilitetin në Ballkanin Perëndimor”. Kryeparlamentari i Kosovës i bëri këto komente gjatë një konferencë të përbashkët për shtyp në Prishtinë me presidentin e Këshillit Kombëtar të Zvicrës, Eric Nussbaumer. Ky është një paralajmërim i përsëritur nga ana e Konjufcës, i cili edhe në fillim të këtij muaji u përpoq të tërhiqte vëmendjen nga rreziku që vjen prej vendit fqinj, duke thënë se në Serbi po përgatiten për sulm ose provokim të mundshëm në Kosovë.