Reperi i njohur, Mozzik është arrestuar mbrëmjen e së martës në aeroportin e Prishtinës, nga policia e Kosovës. Mozzik është arrestuar nga policia doganore dhe është dërguar në ndalim për 24-orë. Reperi publikoi së fundmi në rrjetet sociale një orë të markës së njohur Richard Mille, të cilën e quajti dhuratë para ditëlindjes. Njëra nga orët ka një kornizë transparente prej safiri kristali dhe rrip të bardhë elegant, me një vlerë të konsiderueshme që kap rreth 1.5 milionë euro. Arrestimi i Mozzik u bë mbrëmjen e së martës në aeroportin e Prishtinës, në kuadër të hetimeve për ligjshmërinë e prejardhjes së këtyre sendeve luksoze. Gramoz Aliu, i njohur nga publiku si Mozzik, është një nga artistët më të suksesshëm dhe më të ndikueshëm të skenës muzikore shqiptare. I lindur më 29 shtator 1995 në Ferizaj, Kosovë, ai filloi karrierën e tij muzikore që në adoleshencë, duke u dalluar për stilin e tij të drejtpërdrejtë, tekstet personale dhe energjinë karakteristike në skenë. Mozzik u bë i njohur fillimisht me projektet e publikuara në label-in On Records, duke kapur vëmendjen e publikut shqiptar me këngë që u bënë hite. Por ajo që e veçoi në treg ishte depërtimi i tij në tregun gjerman, falë bashkëpunimeve të fuqishme dhe lidhjes së tij personale e profesionale me këngëtaren Loredana Zefi. ________________________________________ Me stilin e tij unik ku ndërthur rap-in, trap-in, dhe elementë të muzikës moderne urbane, Mozzik arriti të krijojë një identitet të fuqishëm artistik jo vetëm në trojet shqiptare, por edhe në skenën muzikore europiane, veçanërisht në Gjermani, Zvicër dhe Austri. Albumet si “Mozzart”, “Lamboziki” dhe më i fundit “Mërgimstar” (2024) kanë pasur sukses të madh, duke u renditur në top-lista dhe duke i sjellë artistit miliona dëgjime në platformat digjitale.