Dy persona humbën jetën brenda pak orëve, pasi moti i keq pushtoi Greqinë këtë të mërkurë. Një roje bregdetare u mbyt në tentativë për lidhur dhe siguruar motoskafin e shërbimit, në zonën Astros të Peloponezit. Ndërsa pak orë më vonë, në Athinë një grua u përplas për vdekje nga një makinë, që e kishte marrë rrjedhja e ujit. Moti i keq me shira të rrëmbyeshëm dhe stuhi ere përfshiu të mërkurën gjithë vendin fqinj, ku brenda pak orëve në Athinë u raportua se ra mbi 145 mililitër shi. Autoritetet raportojnë për dëme të mëdha në shumë zona, ndërsa me dhjetëra automjete i rrëmbeu uji nëpër rrugët e pushtuara nga uji. Meteorologët paralajmëruan shtrëngata shiu dhe reshje dëbore në zonat malore, që pritet të vazhdojnë deri paraditen e së enjtes. Mbrojtja Civile u kërkoi banorëve të zonave në rrezik të mos dalin nga banesat e tyre, nëse nuk kanë një shkak serioz, ndërsa gjithë mekanizmi shtetëror është vënë në alarm. Gjithë rrugët e Athinës ndodhen nën pushtetin e ujit, ndërsa në zonën e Patrës është pezulluar lundrimi drejt porteve të Jonit dhe drejt Italisë, për shkak të erës së fortë.