Një ndërhyrje estetike në vithe i ka kushtuar jetën një modeleje në Brazil. 33-vjeçarja Aline Maria Ferreira da Silva humbi ndjenjat një ditë pas operacionit dhe ndonëse u dërgua për mjekim në spital, nuk mundi të mbijetonte. Sipas mediave vendase, në trupin e të resë ishte injektuar 30 mililitër PMMA, një mbushës sintetik që përdoret në implantet kozmetike, edhe pse ekspertët kanë paralajmëruar më parë për komplikacione të mundshme. Aline, nënë e një fëmije, me më shumë se 40,000 ndjekës në Instagram, u kthye në klinikë ditën pas operacionit me dhimbje të forta barku, siç tregonte nëna e saj për mediat vendase, por doktori i tha të kthehej në shtëpi se ‘nuk kishte problem’ dhe se ishte një reagim normal. Nëna e të ndjerës tha se Aline i besoi drejtuesit të klinikës pasi kishte kryer edhe më parë ndërhyrje në klinikën e tij. “Bija ime ishte e shëndetshme, ajo nuk kishte probleme, kërkoj drejtësi për këtë që ndodhi”, është apeli i nënës së 33-vjeçares. Pronari klinikës u vu në pranga dhe u la në arrest shtëpie teksa hetimet vijojnë. Sikurse mediat vendase raportojnë, mjeku nuk kishte trajnim të mirëfilltë mjekësor por kryente ndërhyrje ilegale estetike prej vitit 2019, ndërsa raportohet se ai kishte vizituar Aline në spital pas operacionit dhe se i kishte injektuar një anti-mpikës gjaku pa autorizimin e doktorëve aty. Mjeku akuzohet për vrasje me paramendim dhe përdorim i mjekimeve ilegale.