Të premten në Prishtinë, Prokuroria Themelore nisi hetimin për katër vdekje që ndodhën në 24 orë. Policia e Kosovës njoftoi se bëhet fjalë për vdekjet e 4 viktimave meshkuj kosovarë dhe që i kanë konfirmuar mjekët kompetent. Sipas prokurorisë ato u cilësuan si “hetim mbi vdekjen”. “Lidhur me detajet e këtyre rasteve, në këtë fazë nuk mund t’i ndajmë me ju, për shkak se mbesim në pritje të raporteve të autopsisë dhe të rezultateve nga hetimi, të cilat do të ndihmojnë në sqarimin e plotë të tyre”, tha Laureta Ulaj, zëdhënëse në Prokurorinë Themelore të Prishtinës. Ndërkohë mësohet se rastet nuk kanë lidhje me njëra tjetrën dhe kanë ndodhur në periudha të ndryshime kohore brenda 24 orëshit të shkuar dhe po ashtu në lokacione të ndryshme. Sipas informacioneve deri më tani nuk ka dyshime për vrasje por, duhet të priten rezultatet e autopsisë për të dhënë fjalën e fundit mbi shkaktarët.