Kryeministri i Shqipërisë Edi Rama ka pritur në një ceremoni zyrtare medalistët olimpikë të cilët janë vlerësuar me Medaljen e Mirënjohjes. Në Kryeministri në këtë event ishin të pranishëm sportistët e skuadrës olimpike shqiptare, presidenti i KOKSH-it, Ministrja e Sportit dhe Kryetari i Bashkisë së Tiranës. Kryeministri Rama vlerësoi punën e mundësave, që shkruan historinë pasi sollën medaljet e para olimpike për Shqipërinë, por gjithashtu theksoi se ky është rezultati i një punë të gjatë, të bërë ndër vite. “Unë dua të përfitoj nga rasti që të them disa fjalë lidhur me rrugëtimin e bërë deri këtu, sepse këto medalje nuk janë të rëna nga qielli, por janë rezultat i një rruge të re transformimesh që kanë nisur në mbështetje të sportit dhe falë mundësisë është krijuar për qeverinë me zgjedhjen e Fidel Yllit në krye të KOKSH, që na ka dhënë një partner jashtëzakonisht pasionant, këmbëngulës dhe që e ka kthyer marrëdhënien mes qeverisë dhe KOKSH në një marrëdhënie strategjike për një qëllim të përbashkët.