“Presidenti venezuelian Nikolas Maduro ka probleme serioze shëndetësore që kërkojnë trajtim të vazhdueshëm mjekësor, ndërsa bashkëshortja e tij, Cilia Flores, ka pësuar lëndime të rënda gjatë rrëmbimit”, deklaruan avokatët mbrojtës gjatë seancës së parë gjyqësore në Nju Jork. Avokatët Barry Pollack dhe Mark Donnelly i paraqitën këto pretendime përpara gjyqtarit të qarkut të Nju Jorkut, Alvin Hellerstein, gjatë seancës dëgjimore fillestare, duke theksuar se gjendja fizike e çiftit duhet të merret seriozisht në konsideratë nga gjykata. Disa analistë amerikanë e kanë cilësuar këtë linjë mbrojtjeje si një strategji të pritshme ligjore dhe politike. Sipas tyre, pretendimet për dhunë ndaj bashkëshortes kanë ndikim të fortë emocional në opinionin publik dhe shërbejnë për të forcuar mbështetjen e militantëve dhe simpatizantëve të Maduros. Cilia Flores u deklarua e pafajshme për akuzat e konspiracionit në trafikun e drogës. Ajo u prezantua në sallën e gjyqit si “Zonja e Parë e Republikës së Venezuelës” dhe, pas deklarimit formal, theksoi se është “plotësisht e pafajshme”. Seanca zgjati rreth 30 minuta dhe Maduro gjithashtu u deklarua i pafajshëm dhe e konsideroi veten një i burgosur politik.