Kosova dhe Serbia kanë arritur dakordimin për funksionalizimin e komisionit të përbashkët për të pagjeturit që buron nga marrëveshja për Personat e Zhdukur me Dhunë. Kryenegociatori i Kosovës në dialog me Serbisë, Besnik Bislimi tha se pas dakordimit tashmë mbetet të përcaktohen prioritetet e këtij komisioni. Bislimi njoftoi se diskutimet e ditës së enjte u zhvilluan të formatit bilateral me ndërmjetësin Peter Sorensen. Kryenegociatori i Kosovës tha se u prekën edhe tema të tjera përpos asaj për të pagjeturit, porse për to duhet të pritet formimi i qeverisë së re. Ndërkohë, Petar Petkoviq, kryenegociator i Serbisë tha që pas takimit sot “ pret përshpejtim në drejtim të gjetjes së të gjithë të zhdukurve”. Petkoviq shtoi se në takimet me Sorensenin ka kërkuar sërish formimin e Asociacionit të komunave me shumicë serbe. Komisioni i përbashkët për personat e pagjetur është pjesë e Deklaratës së përbashkët për personat e zhdukur, për të cilën u pajtuan kryeministri i Kosovës, Albin Kurti dhe presidenti i Serbisë, Aleksandar Vuçiç, më 2023. Në luftën e zhvilluar në Kosovë, janë vrarë mbi 13.000 civilë dhe mijëra të tjerë janë zhdukur. Afër 1.600 persona vazhdojnë të jenë ende të pagjetur. Takimi i 22 janarit ishte i pari në kuadër të dialogut për normalizimin e marrëdhënieve ndërmjet Serbisë dhe Kosovës këtë vit.