Byroja Kosovare e Sigurimeve këtë të enjte ka qenë cak i Prokurorisë Themelore të Prizrenit dhe Policisë së Kosovës. Në një aksion të gjerë, të zhvilluar në Prizren, Prishtinë, Pejë, Gjilan, Ferizaj, Mitrovicë dhe Gjakovë ka arrestuar 39 persona, në mesin e të cilëve edhe ish-drejtorin e BKS-së, Sami Mazrekun dhe ish-drejtorin financiar, Valon Berisha. Sipas prokurorisë së Prizrenit, të njëjtët kanë keqpërdorur autorizimet dhe kanë kryer transaksione të jashtëligjshme për përfitime vetanake. Kanë keqpërdorur autorizimet ekonomike dhe kanë përpiluar dokumente të falsifikuara të cilat ne, deri në këtë fazë, kemi vlerësuar që ato dokumente i kanë përdorur si të mirëqena dhe përmes kësaj i kanë shkaktuar dëm Byrosë Kosovare të Sigurimeve në vlerë prej 1 milion e 43 mijë euro Kryeprokurori i Themelores në Prizren ka treguar se të dyshuarit kanë kryer kompensime të shumëfishta për aksidentet e trafikut, për të cilat të aksidentuarit ishin kompensuar vite më parë. Ne kemi arritur të sigurojmë 166 transaksione të dyshimta, në mesin e tyre, 25 transaksione kanë të bëjnë me 12 persona me të cilët kanë arritur ujdi fiktive jashtëgjyqësore, kinse për përfaqësim si të autorizuar të personave që më herët kanë pasur aksidente në komunikacion dhe i kanë kompensuar në vitin 2022 dhe 2023 Sipas hetimeve të prokurorisë, nga të dyshuarit janë aplikuar edhe 141 transaksione pa asnjë dokument ku shuma më e vogël ishte mbi 6 mijë euro e më e larta deri në 68 mijë euro. Nga aksioni i bastisjes, janë sekuestruar të holla kesh në vlerë prej 23 mijë e 700 euro, ari, aksesorë, orë dore, armë, pajisje elektronike dhe janë bllokuar mjete financiare mbi një milion euro.