Tyson Fury ka zbuluar se gruaja e tij pësoi një abort përpara se ai të humbiste nga ukrainasi Oleksandr Usyk në Arabinë Saudite në maj. Fury tregoi se si gruaja e tij, Paris, ishte 6-muajshe shtatzënë kur humbi atë që do të ishte fëmija i tyre i tetë. Fury u shpreh: “Ajo ishte në muajin e 6 të shtatzënisë. Nuk është si një abort. Ajo lindi fizikisht një fëmijë të vdekur, vetë, ndërsa burri i saj ishte larg”. Fury tha se gruaja e tij nuk i tregoi atij për abortin fillimisht, por u shpreh se e dinte se kishte një problem kur ajo tha se nuk mund të merrte pjesë në duelin në Riad. “I thashë vëllait tim se ajo e kishte humbur fëmijën. Ajo kurrë nuk më tha se e kishte humbur fëmijën, por unë e dija. Kur u ktheva mora konfirmimin e pashmangshëm se fëmija nuk ishte më. Unë nuk mund të isha aty për të në atë moment. Dhe kjo është e vështirë për mua, është e vështirë që nuk mund të isha atje me të në atë kohë.”, tha ai. Fury këmbëngulte se aborti spontan i gruas së tij nuk kishte ndikim në performancën e tij në betejën kundër Usyk, të cilën ai beson se e fitoi, por që iu dha ukrainasit me vendim të jurisë. “Ky nuk është një justifikim. Unë jam një njeri i nderit. Unë bëj atë që duhet të bëj kur jam atje”, tha ai. Rivalët do të takohen sërish më 21 dhjetor, por pa rrezikun e titullit të IBF-së, pasi Usyk zgjodhi të hiqte dorë nga ai në vend që të bënte një mbrojtje të detyrueshme.