Pas 10 ditësh në paraburgim, reperi Rigels Rajku, i njohur si Noizy ka lënë pasditen e sotme qelinë e paraburgimit. Noizy është liruar me vendim të Gjykatës së Durrësit, ndërsa Kosova e ka shpallur në kërkim pasi e akuzon se ka dhunuar personazhin e TikTok-ut, Medi Iseni. Gjyqtari i çështjes pranoi kërkesën për lirimin e reperit përmes garancisë pasurore prej 5 milionë lekëve të reja. Sapo kaloi pragun e paraburgimit, reperi është shfaqur live në rrjetin social Instagram për të falenderuar të gjithë ata që e mbështeten në këto ditë të vështira. Po ashtu ai theksoi se ka besim te drejtësia e shqiperisë dhe kosovës për zbardhjen e ngjarjes. Dhunimi i boksierit Medi Iseni ndodhi në orët e para të mëngjesit të 2 Gushtit në një klub nate në Pejë. Reperi Rigels Rajku e konsideroi të padrejtë urdhër arrestin e lëshuar ndaj tij nga Policia e Kosovës dhe mohon të jetë përfshirë në sherrin e ndodhur në Pejë. Nga ana tjetër, boksieri Medi Iseni akuzon reperin Stresi si personin që e futi në kurth duke i kërkuar takim në një lokal, ku më pas u dhunua nga Noizy dhe grupi i tij.