Anija ushtarake italiane Libra, me në bord emigrantë nga Bangladeshi dhe Egjipti, nisi dje lundrimin nga Ishulli i Lampedusës drejt Shëngjinit, një distancë prej mbi 1200 kilometrash, për të sjellë të mërkurën emigrantët e parë në qendrat e pritjes në Shqipëri. Në këtë mënyrë ka marrë jetë përpjekja e qeverisë së Giorgia Melonit në bashkëpunim me kryeministrin Edi Rama për të “procesuar” në Shqipëri kërkesat për azil, pasuar nga një riatdhesim i shpejtë i të refuzuarve, me shpresë se një masë e tillë do të dekurajoje turmat e emigrantëve, të cilët nisen zakonisht nga brigjet e Libisë me destinacion vendet e bashkimit europian. Sipas planit, synohet të procesohen në Shqipëri 3 mijë kërkesa për azil në muaj, për një total prej 36 mijë personash në vit. Përpara se të nisen për në Shqipëri, autoritetet italiane kanë bërë një filtrim të emigrantëve, në mënyrë që të familjet të mos ndahen, gratë dhe fëmijët të mos sillen në shqipëri dhe po ashtu personat që vijnë nga vende jo të sigurta. Ambientet e ndërtuara në shqiperi do të drejtohen plotësisht nga Italia dhe të dyja qendrat, si ajo e shengjinit ashtu edhe e gjadrit janë nën juridiksionin italian.