Daily Telegraph hedh hije dyshimi mbi presidentin serb Aleksandar Vucic dhe skandalin që ka shpërthyer ditët e fundit mbi të ashtëquajturin “safari snajperësh” në Sarajevë gjatë Luftës së Bosnjës, ku të huaj të pasur dyshohet se paguan shuma të mëdha parash për të qëlluar mbi civilët. Sipas medias së njohur britanike, Vucic dyshohet të ketë qenë i pranishëm në një nga pozicionet ushtarake mbi qytet nga ku shënjestroheshin banorët e pafajashëm gjatë rrethimit famëkeq që zgjati nga viti 1992 deri në vitin 1996. Ajo pretendon se kanë dalë në dritë video që tregojnë një Vucic më të ri në moshë duke udhëtuar në një automjet. Pretendimet kundër presidentit serb, - të cilat ai i mohon me forcë - janë ngritur nga gazetari investigative kroat, Domagoj Margetic. Ai ka paraqitur një ankesë kundër presidentit serb, te prokurorët italianë, të cilët tashmë po hetojnë akuzat se italianët, rusët dhe amerikanët morën pjesë në "safari snajperësh njerëzorë" gjatë konfliktit. Margetic thotë se e ka informuar zyrën e prokurorit publik për të gjitha njohuritë e mia në lidhje me lidhjen e Aleksandar Vuçic me safarit njerëzor në Sarajevën e kohës së luftës”. “Kam bashkëngjitur të gjitha provat, materialet video, dokumentacionin fotografik, atë audio dhe video, si dhe dokumentacionin mediatik të asaj kohe”, thekson ai. Margetic i mëshon idesë se Vucic ishte “anëtar i një njësie paraushtarake, nën kontrollin e Partisë Radikale Serbe nga Serbia, gjatë luftës në vitet 1992 dhe 1993”. Njësia ishte “e stacionuar në një pozicion lufte... në varrezat hebraike në Sarajevë”, sipas Margetic, që shton se varrezat u përdorën si pozicion snajperi nga forcat serbe. Gazetari është i bindur se informacionet që ka e “vendosin kreun e shtetit serb në kohën dhe vendin e këtyre krimeve”, duke iu referuar edhe pamjeve video nga viti 1993 të cilat, sipas tij, tregonin Vuçic duke mbajtur një pushkë në dorë. Mbështetësit e udhëheqësit serb i kanë hedhur poshtë pretendimet dhe thanë se objekti në pamje ishte një 'tripod' kamerash televizive, të cilin Vuçic e mbante sepse punonte si gazetar në atë kohë. Vetë Vucic është shprehur se objekti në fjalë, ishte një cadër.