Për më shumë se tre orë, i dërguari i Bashkimit Evropian, Miroslav Lajcak ndërmjetësoi takimin e radhës mes kryenegociatorëve të Kosovës dhe Serbisë, i cili edhe këtë të martë përfundoi pa rezultate konkrete. Kryenegociatori i Kosovës, Besnik Bislimi pas takimit u shpreh se pala serbe ishte e gatshme të diskutonte vetëm për një pjesë të Marrëveshjes bazike edhe pse takimi ishte thirrur për të diskutuar planin e sekuencimit. “Pika e vetme e agjendës në të cilën ne duhej të shënonin përparim ishte diskutimi i finalizimit të planit të sekuencimit. Megjithatë nga pala serbe u bë e qartë prej fillimit se ata duan të zbatojnë vetëm pjesë të Marrëveshjes Bazë, që janë në harmoni me vijat e tyre të kuqe. Ne nuk i kemi parë kurrë ato vija të kuqe. Petkoviq nuk ishte i interesuar as të bisedojë për planin e sekuencimit. Ai ishte i interesuar vetëm në një gjë, në mbështetjen e draftit të Asociacionit”, u shpreh Bislimi. Ndërkohë, kryenegociatori i Serbisë, Petar Petkoviq akuzoi Prishtinën se nuk dëshiron normalizim të marrëdhënieve, pasi pala kosovare sipas tij, nuk pranoi të diskutojë për draft-statutin e asociacionit të komunave me shumicë serbe.