Reagimet nga përtej kufijve, bashkohen të gjitha në një pikë: forcat politike në Shqipëri duhet të pranojnë rezultatin e zgjedhjeve! Dy analistë në zë amerikanë, Profesori Daniel Serwer i Universitetit Johns Hopkins dhe Damon Wilson i Këshillit të Atlantikut, thanë për VOA-n se Shtetet e Bashkuara duan të shikojnë integrimin e Shqipërisë dhe forcimin e institucioneve, përfshirë pavarësinë e gjyqësorit dhe funksionimin e parlamentit. “Rruga përpara është me pjesëmarrjen e plotë të opozitës dhe duke respektuar opozitën, por edhe respektimin e rezultateve të zgjedhjeve dhe përgjegjësive të partisë qeverisëse. Dhe ato përgjegjësi përfshijnë konsolidimin e institucioneve demokratike, veçanërisht të gjyqësorit të pavarur”, tha Serwer. Wilson, zv/president ekzekutiv në Këshillin e Atlantikut kujton se ka pasur shumë pasiguri në Bruksel dhe Uashington lidhur me ritmin e integrimit të Shqipërisë në Bashkimin Europian. “ Shpresoj që ky mandat të jetë sinjal për qeverinë, por edhe për opozitën se ky është një mandat që i duhet vendit për të ecur përpara në disa nga çështjet kryesore si sundimi i ligjit dhe masat antikorrupsion, për të çuar përpara procesin e anëtarësimit në BE”, u shpreh ai. Sipas Wilson, zgjedhjet dërguan po ashtu sinjalin që njerëzit duan të shohin opozitën të luajë rolin e saj. “Njerëzit duan të shohin demokracinë në funksionim, duan të shohin opozitën të marrë pjesë në demokracinë parlamentare të Shqipërisë dhe të jetë opozitë aktive brenda parlamentit, mbështetëse e interesave të vendit", ishte komenti i tij.