Pas denoncimeve të mëparshme për mashtrime me viza gjermane dhe për punëtorë të papaguar, çifti Alejda dhe Elton Dumani rikthehet sërish në qendër të ankesave. Një qytetar nga Tirana denoncon në Fiks Fare se ka paguar 2,800 euro për ndërtimin e një kuzhine dhe një etazhere pranë mobilerisë "Luna", por, sipas tij, pas katër muajsh punimet ende nuk kanë përfunduar. Denoncuesi tregon se familja e tij ka mbetur pa mundësi për të përdorur kuzhinën, ndërsa kërkesat për përfundimin e punimeve ose kthimin e parave nuk kanë marrë zgjidhje. Sipas tij, në dokumente pronare figuron Alejda Dumani, ndërsa komunikimet janë zhvilluar me Elton Dumanin, i cili gjatë kësaj periudhe ka dhënë disa premtime dhe shpjegime për vonesat. Gazetarët e Fiks Fare shkuan pranë mobilerisë "Luna" dhe kontaktuan në telefon Elton Dumanin, i cili premtoi se puna do të përfundonte të nesërmen. Megjithatë, edhe pas kalimit të një muaji, sipas denoncuesit, kuzhina vazhdon të jetë e papërfunduar.