Për shqetësimin e qytetares nga qyteti i Pogradecit, gazetarët e Fiks Fare telefonuan zyrën e koordinatorit për të Drejtën e Informimit të Prokurorisë në qytetin e Pogradecit për të pyetur se çfarë masash janë marrë për sigurinë e qytetares dhe të familjarëve të saj deri në përfundim të hetimeve të kësaj çështje. Ky institucion ktheu përgjigje se ka regjistruar procedimin penal me numër 102 në datën 24 mars 2023 me akuzën e kanosjes. Por, përmend se s’mund të japë më shumë informacion për shkak të sekretit hetimor. Në të njëjtën përgjigje prokuroria shkruan se, pa cënuar këtë sekret, në datën 17 mars 2023, në orën 12.00 në Policinë e Pogradecit ka paraqitur ankim shtetësja E.H, e cila ka deklaruar se prej 1 muaji është kanosur nga shtetasi E.P. 6 ditë më vonë, ankuesja është riparaqitur në polici dhe ka deklaruar se në banesën e saj ka shkuar shtetasi D.P, ku e ka qëlluar në pjesën e krahur dhe e ka shtyrë. Policia pohon se ankuesja s’ka pranuar të shkojë për vizitë në spital. Oficeri i policisë gjyqësore ka kqyrur dhe ka marrë nga ankuesa 2 video me pamje filmike. Në fund, Prokuroria e Pogradecit nuk jep asnjë informacion për veprimet e mëtejshme, duke cituar se janë “sekret”. Nga data 17 mars, kur ishte dita e parë e kallëzimit të denoncueses, e deri në ditët e sotme, ndaj personit të kallëzuar s’ka asnjë masë shtrënguese; detyrim paraqitje, arrest shtëpie apo arrest me burg! Për pasojë, nga mungesa e veprimeve të policisë dhe prokurorisë, ankuesja vijon të ndihet e kërcënuar, pasi çdo ditë, ajo shikon në rrjete sociale kërcënimet e radhës.