300 banorë të fshatit Liras në zonën e Gramshit kanë kërkuar ndihmën e emisionit Fiks Fare pasi prej 10 ditësh si pasojë e reshjeve të shumta është shembur ura e fshatit me të cilën lidhen me qytetin. Ata thonë se fëmijët kanë disa ditë që qëndrojnë në shtëpi sepse nuk kalojnë dot. Kjo urë është ndërtuar që në vitin 2008 dhe që në atë kohë ka patur problemet e saj. Çdo vit shëmbet dhe nuk është e qëndrueshme. "Bashkia vjen e riparon, por përsëri shëmbet. Kemi kërkuar disa herë ndihmë për këtë urë, bashkia vjen hedh 2-3 kova zhavorr mbi urë dhe vijnë prurjet e Holtës, prapë një avaz. Tani nuk kemi parë asnjë nga institucionet të vijnë edhe pse jemi ankuar në bashki" pohojnë banorët. me prishjen e kohës dhe reshjeve të shumta të shiut, lumi rrit nivelin e tij duke prishur urën. Banorët shprehen se shpesh herë janë munduar ta rregullojnë vetë sa munden duke i vendosur dërrasa sipër. Përsa i përket transportit dhe lidhjen me pjesën tjetër banorët pohojnë se mbi një zetor vendosin makinat personale dhe ata sipër dhe kalojnë lumin. Nuk kanë munguar edhe rastet kur mjetet i kanë lënë të parkuara nga ana tjetër e urës, por me frikën se të nesërmen mund t'ua kishin dëmtuar.