Fiks Fare kishte si objekt investigimi ketë të hënë trafikimin e paligjshëm që u bëhet fëmijëve sirianë, të cilët pasi mbërrijnë tek qendra e mbrojtjes së fëmijëve në Tiranë zhduken pa lënë gjurmë. Edhe pse kjo qendër merr miliona lekë për të trajtuar dhe mbajtur këto fëmijë, mjaftohet vetëm me faktin e denoncimit në polici të fëmijëve si të zhdukur dhe më pas policia i shpall në kërkim. Ndërkohë që deri më sot policia nuk ka arritur t'i gjejë apo të rikthehen fëmijët e largua nga kjo qendër fati i të cilëve nuk dihet. Për këta fëmijë të pambrojtur nuk ka asnjë informacion të vetëm se ku ndodhen apo jetojnë. Gazetarët e Fiks Fare pasi mësuan mbi faktin e zhdukjes së gjashtë fëmijëve në një ditë nga Qendra e Mbrojtjes së Fëmijëve në Tiranë, nisen edhe investigimin, ku fillimisht takuan punonjësit e kësaj qendre. Sipas këtyre punonjësve është e vërtet që fëmijët sirianë, egjiptian apo maroken që janë kapur në kufi janë sjell pranë qendrës, ata kanë qëndruar disa ditë dhe më pas ata janë zhdukur sërish nga kjo qendër, duke mos u kthyer më. Sipas punonjësve fëmijët përfitojnë nga një orar prej dy orësh që ata kanë të drejt të dalin nga kjo qendër. Orar që duket që askush nuk i shoqëron. Punonjësit tregojnë se për të gjitha rastet është bërë denoncim në polici, por deri më sot asnjë fëmijë nuk është gjetur.