Krijuesi i “world wide web”, Sir Tim Berners-Lee, po shet kodin origjinal të përdorur në krijimin e internetit modern, si NFT. NFT-të janë një formë unike e pronësisë vetëm për artikujt dixhitalë, dhe nuk përfshijnë domosdoshmërisht kontrollin e të drejtës së autorit. Ata gjithashtu janë kritikuar gjerësisht si një skemë për qëllime përfitimi si dhe që dëmton mjedisin. Disa shprehën habi për lajmin, nisur nga fakti që Sir Tim nuk e patentoi kurrë shpikjen e tij. Shitja po trajtohet nga shtëpia e ankandeve Sotheby's dhe paratë e mbledhura do të shkojnë për kauzat e zgjedhura nga Sir Tim dhe gruaja e tij, tha Sotheby's. Sir Tim shpiku web-in, mënyrën moderne me të cilën përdorim internetin, në vitin 1989. Ai propozoi një mënyrë për të lidhur informacione të ndryshme të ruajtura në Internet me njëri-tjetrin përmes hiperlinkeve dhe krijoi serverin dhe browser-in e parë të internetit. Faqja e parë e internetit, e përshkruante më së miri idenë: "Akses universal për një univers të tërë dokumentesh." Sotheby's po nxjerr në ankand një koleksion prej katër artikujsh të ndryshëm si një NFT i vetëm dixhital. Gjithsej, janë gati 10,000 rreshta kod i shkruar. Sir Tim nuk u përpoq kurrë të fitojë para direkt nga shpikja e tij, dhe rrjeti mbetet një standard i hapur. CERN, organizata kërkimore në të cilën Sir Tim punonte asokohe, hoqi dorë nga të gjitha të drejtat e saj për teknologjinë dhe e la atë në pronësi publike në 1993. Sotheby's reklamon koleksionin si "kopja e vetme e nënshkruar e kodit për shfletuesin e parë të internetit, që ekziston", në të njëjtën mënyrë sic mund të shitet dorëshkrimi i një njeriu të famshëm.