Gara e armatimit mes Shteteve të Bashkuara, Kinës dhe Rusisë po intensifikohet, ndërsa fuqitë e mëdha po përshpejtojnë zhvillimin dhe prodhimin e armëve hipersonike. Sinjali më i fundit vjen nga kompania amerikane e mbrojtjes Lockheed Martin, e cila ka siguruar një kontratë prej 694 milionë dollarësh nga Forcat Ajrore të SHBA-së për prodhimin e një rakete të re hipersonike, të njohur si ARRW. Këto armë fluturojnë me shpejtësi të paktën pesë herë më të madhe se ajo e zërit, duke arritur rreth 6.100 kilometra në orë. Aftësia për të ndryshuar drejtim gjatë fluturimit i bën ato veçanërisht të vështira për t'u zbuluar, gjurmuar dhe neutralizuar nga sistemet tradicionale të mbrojtjes ajrore. Kina dhe Rusia konsiderohen ndër fuqitë më të avancuara në këtë fushë. Pekini ka ndërtuar arsenalin më të madh të armëve hipersonike, ndërsa Moska ka fituar përvojë operative duke përdorur raketa të këtij lloji gjatë luftës në Ukrainë. Sipas parashikimeve të analistëve, nëse vazhdojnë ritmet aktuale të prodhimit, deri në vitin 2035 Kina dhe Rusia mund të zotërojnë së bashku rreth 5.000 armë hipersonike, prej të cilave 4.000 do t'i përkasin Kinës. Ndërkohë, Uashingtoni po përpiqet të përshpejtojë programet e veta, si në zhvillimin e armëve sulmuese, ashtu edhe në ndërtimin e sistemeve mbrojtëse. Pentagoni parashikon të investojë 37.9 miliardë dollarë në programet hipersonike gjatë viteve fiskale 2027–2031. Fondet do të shpërndahen mes ushtrisë, marinës dhe forcave ajrore, me synimin për të rritur ndjeshëm kapacitetet ushtarake amerikane dhe për të ngushtuar hendekun me rivalët strategjikë.