Rusia vijon sulmet mbi Ukrainë pavarësisht thirrjeve të ndërkombëtarëve apo tryezave të dialogut. Kjo këmbëngulje e ka bërë Rusinë që të hyjë në histori tashmë edhe për numrin e lartë të shteteve që kanë vendosur sanksione ndaj saj. Sipas Qendrës Kundër Dezinformimit, Rusia është bërë vendi më i sanksionuar gjatë tetë viteve të fundit më shumë se Koreja e Veriut, Mianmari, Kili, Kuba, Kina, Irani dhe Siria gjatë 70 viteve. Pas vendosjes së sanksioneve në vitin 2014, produkti i brendshëm bruto i Rusisë ra me 2%, ndërkohë po të njëjtat burime flasin se pas sanksioneve të fundit, vendi pritet të falimentojë. Sipas parashikimeve më optimiste për Rusinë, falimentimi i vendit mund të ndodhë jo më herët se në muajin maj, për shkak të bllokimit ndërkombëtar ndaj Putin. Por pavarësisht kësaj, Putin nuk heq dorë, ndërsa ka nisur bombardimet mbi një tjetër qytet ukrainas. Trupat ruse kanë bombarduar me intensitet mbrëmjen e së premtes qytetin jugor Mykolaiv. Vitaliy Kim, kreu i rajonit, tha se po luftohet për të zmbrapsur trupat ruse. Sipas tij, bombat kanë goditur kudo, pa diferencim, duke përfshirë edhe një lokal dhe pallat. Videot e sulmit janë publikuar në rrjetet sociale, teksa vendi shihet i mbuluar nga tymi e flaka. Kujtojmë se agresioni rus mbi Ukrainën është në ditën e 17 të tij.