Ishte projektuar të ishte avioni luftarak më i përparuar i Evropës - i shpejtë, vdekjeprurës dhe i rrethuar nga një tufë dronësh të armatosur. I prezantuar nga udhëheqësit e Francës dhe Gjermanisë në vitin 2017, fushëveprimi dhe ambicia e Sistemit të Avionëve të Luftimit të Ardhshëm (FCAS) prej 100 miliardë eurosh ishte e pabesueshme. Por gati një dekadë më vonë, projekti duket më pak si kulmi i aspiratës evropiane dhe më shumë si një divorc i çrregullt, simbolik në marrëdhëniet franko-gjermane, që konsiderohet edhe ‘motori’ i Bashkimit Evropian. Dhe projekti është në rrezik në një kohë kur bashkëpunimi i sigurisë është i nevojshëm dhe më urgjent se kurrë, me Rusinë që qëndron mbi krahun lindor të NATO-s. Këtë javë, Emmanuel Macron, presidenti francez, u detyrua të mbronte projektin e avionit pasi gazeta Handesblatt në Gjermani paralajmëroi se ai ishte në prag të kolapsit. Dy kompanitë kryesore pas projektit, Dassault Aviation në Francë dhe Airbus në Gjermani, janë grindur për vite me radhë. Që nga fillimi, ato u përplasën për aspekte themelore të projektit, siç është kush ishte përgjegjës dhe kush do ta ndërtonte atë në të vërtetë.