Franca dhe Belgjika kanë hyrë në fazën e re të heqjes së kufizimeve kundër koronavirusit. Në Francë, baret, restorantet, palestrat dhe pishinat janë duke mirëpritur njerëzit në ambiente të mbyllura, për herë të parë pas shtatë muajve. Belgjika po ashtu ka hequr kufizimet për ambientet e brendshme në bare dhe restorante. Megjithatë, të dyja vendet kanë kufizuar numrin e personave që mund të vizitojnë këto ambiente. Në Francë, baret dhe restorantet mund të operojnë me 50 % të kapacitetit brenda. Palestrat dhe pishinat po ashtu do të mund të shfrytëzojnë vetëm gjysmën e kapacitetit. Ndërkohë, hapësirat e jashtme do të mund të shfrytëzohen plotësisht. Një pronar lokali në Paris tha për AFP se “është e çuditshme të dëgjosh një klient që thotë ‘një kafe brenda të lutem’”. Ora policore gjatë natës do të shtyhet nga ora 21 në orën 23. Vizitorët nga vendet e BE, Australia, Izraeli, Libani dhe Koreja Jugore, do të mund ta vizitojnë Francën pa bërë test PCR për koronavirus, nëse janë të vaksinuar me ndonjë nga vaksinat e miratuara nga blloku evropian. Në Belgjikë, nëpër tavolinat e restoranteve do të mund të ulen deri në katër persona bashkë. Në organizimet e brendshme mund të marrin pjesë 200 persona. Gjithashtu, belgët tani mund ta vizitojnë njëri-tjetrin nëpër shtëpi, deri në katër persona.