Qeveria greke ka vendosur ta bëjë të detyrueueshëm vaksinimin anti-covid, duke nisur brenda këtij muaji me disa nga strukturat e shërbimeve publike shtetërore dhe private, për të vijuar në shtator me zgjerimin e kategorive. Qëllimi i vaksinimit të detyrueshëm është, nga njëra anë, të mbrojë grupet e popullatës që bien në kontakt të drejtpërdrejtë me grupet specifike të punës, dhe, nga ana tjetër, të japin një shembull që duhet të ndjekin qytetarët skeptikë, thuhet në argumentimin që qeveria i bën vendimit. Kategoritë që nisin menjëherë t’i nënshtrohen vaksinimit të detyrueshëm janë punonjësit në azilet e të moshuarve, pasi atje ka grupe të prekshme dhe mbrojtja e pleqve nga virusi dhe varianti Delta është me rëndësi të madhe, thuhet në vendimin që pritet të kalojë për miratim në të gjitha hallkat shtetërore. Personeli mjekësor ende nuk është vaksinuar plotësisht. Një pjesë kanë refuzuar, të tjerë nuk kanë dashur të vaksinohen pasi thonë se kanë kaluar kovidin dhe kanë antitrupa, kurse plot të tjerë kanë pranuar të marrin vetëm një dozë.