Rusia tha të dielën se ushtria e saj kishte avancuar më tej në Ukrainën lindore, duke kapur një fshat të vijës së parë vetëm disa kilometra në veri të një qyteti ukrainas, që është nën kontrollin e ushtarëve të Kievit. Njësitë e ushtrisë ruse, sipas Ministrisë ruse të Mbrojtjes, kanë marrë nën kontroll Izmailivkan. Përpara se Rusia të niste pushtimin në Ukrainë në shkurt të vitit 2022, Izmailivka kishte rreth 200 banorë. Ky fshat gjendet vetëm 8 kilometra në veri të qytetit industrial të Kurakovas. Njoftimi u bë vetëm disa orë pasi Rusia pretendoi se kishte rrëzuar 51 dronë të Ukrainës mbi disa rajone të saj, përfshirë edhe pranë kufirit. Presidenti rus Vladimir Putin paralajmëroi të dielën se Moska do të "përgjigjet" nëse Perëndimi do të lejojë Ukrainën të përdorë armë me rreze më të gjatë kundër territorit të tij. "Është shumë herët për të thënë ende, por sigurisht që departamenti ynë ushtarak po mendon për këtë dhe do të ofrojë përgjigje të ndryshme," i tha Putin një gazetari të televizionit shtetëror të Rusisë.