Presidenti ukrainas Volodymyr Zelenskiy hodhi poshtë propozimin gjerman për t'i dhënë Ukrainës anëtarësim "të asociuar" në Bashkimin Europian, duke thënë se plani do ta linte Kievin pa zë brenda bllokut. Kancelari gjerman Friedrich Merz sugjeroi në mesjavë lejimin e Ukrainës për të marrë pjesë në takimet e BE-së pa të drejtë vote si një hap i përkohshëm drejt anëtarësimit të plotë, duke argumentuar se ky veprim mund të ndihmonte në avancimin e përpjekjeve për t'i dhënë fund luftës së shkaktuar nga pushtimi i Rusisë. Në një letër dërguar udhëheqësve europianë dhe të shqyrtuar nga Reuters, Zelenski tha se propozimi nuk do t'i siguronte Ukrainës pjesëmarrje kuptimplote në vendimmarrjen e BE-së. Letra iu drejtua Presidentit të Këshillit, Antonio Costa-s dhe Presidentes së Komisionit, Ursula von der Leyen. Ideja e Merz është kritikuar edhe nga ekspertë, që argumentojnë se gjysmëanëtarësimi do të dekurajonte vendet kandidate nga ndërmarrja e reformave të nevojshme për shtetin e së drejtës.