Autoritetet e Texas-it në SHBA, kanë ekzekutuar një të dënuar me vdekje i cili vrau gruan e tij shtatzënë, vajzën 5-vjeçare dhe vjehrrin, më shumë se një dekadë më parë. John Hummel mori një injeksion vdekjeprurës të mërkurën në mbrëmje në një burg shtetëror në Huntsville për vrasjet. 45-vjeçari goditi fatalisht gruan e tij Joy më shumë se 30 herë, në shtëpinë e tyre Fort Ëorth në Dhjetor 2009, pastaj rrahu vajzën e tij dhe vjehrrin në karrocë invalidësh me një shkop bejsbolli, para se t’i vinte flakën shtëpisë. Në gjyq prokurorët thanë se ai vrau familjen e tij sepse donte të arratisej me një grua që kishte takuar në një dyqan. Pas vrasjeve, roja i spitalit u largua në Oceanside, California, ku u arrestua dhe rrëfeu vrasjet. Avokatët e tij pretenduan se ai vuante nga çrregullimi i stresit post-traumatik kur e bëri vrasjen, por prokurorët gjithashtu thanë se Hummel më parë u përpoq të vriste familjen e tij duke i vendosur helm miu në ushqim. Ekzekutimi i Hummel ishte planifikuar për në Mars të vitit 2020, por u shty për shkak të pandemisë së Covid-19. “Ky burrë mori pa kuptim jetën e një nëne, një fëmije dhe një gjyshi që bëri gjithçka për ta. Të vrasësh prej dëshirës për të qenë beqar është e pakuptimtë”, tha prokurori Miles Brissette. Hummel është i burgosuri i dytë në Teksas i ekzekutuar në 2021 dhe i pesti në SHBA. 27 shtete aplikojnë ende dënimin me vdekje. Në Teksas, si në shumicën e vendeve të tjera, njerëzit me ngjyrë dënohen në mënyrë disproporcionale me vdekje. Ata përbëjnë më pak se 13% të popullsisë, por përbëjnë 44.5% të të dënuarve me vdekje, sipas Koalicionit për Heqjen e Dënimit me Vdekje në Teksas.