Forcat ajrore të Izraelit dhe militantët palestinezë shkëmbyen zjarr përtej kufirit të Gazës të enjten në mëngjes, duke përshkallëzuar akoma më shumë situatën. Dhuna dhe luftimet përgjatë frontit të Gazës, të nxitura nga përplasjet mes policisë izraelite dhe palestinezëve në Jerusalem, duket të jenë ndër betejat më të ashpra ndërkufitare që nga lufta 11-ditore e vitit të kaluar. Një raketë e lëshuar nga Gaza këtë javë shkatërroi një periudhë qetësie disamujore që pasoi luftën. Militantët palestinezë hodhën dy raketa drejt Izraelit nga Rripi i Gazës të mërkurën vonë dhe të enjten herët në mëngjes ndërkohë që avionët izraelitë morën në shënjestër militantët në rripin e gazës, të kontrolluar nga Hamasi. Një raketë ra në qytetin jugor izraelit të Sderot që është vënë shpesh herë në shënjestër, dhe një tjetër ra në Gaza, tha ushtria izraelite. Përleshjet ndezën sirenat e sulmit ajror nëpër pjesë të Izraelit jugor, duke prishur qetësinë e javës së Festës së Pashkës. Të enjten herët, avionët luftarakë izraelitë kryen sulme ajrore në Rripin qendror të Gazës, njoftuan mediat lokale. Postimet në mediat sociale nga aktivistët treguan tymin që ngrihej në ajër. Tensionet janë rritur javët e fundit pas një sërë sulmesh vdekjeprurëse brenda Izraelit, operacioneve ushtarake izraelite në Bregun e pushtuar Perëndimor dhe përleshjeve të përsëritura midis izraelitëve dhe palestinezëve në kompleksin Al-Aksa.