Goditet një tjetër rast i trafikut të hashashit me rulot nga Shqipëria për në vendet e Bashkimit Europian. Policia kufitare njoftoi se në Kapshticë ka arrestuar një shtetas rumun, pasi në makinën e pushimit me të cilën po dilte nga Shqipëria për në drejtim të Greqisë iu gjetën 80 kilogram hashash. Drejtuesi i mjetit është arrestuar menjëherë, ndërsa po hetohet për destiancionin e lëndës narkotike dhe se ku është furnizuar në Shqipëri. Ky është rasti i tretë që rumunët kapen duke dalë nga Shqipëria me sasi të mëdha hashashit. Rasti i parë u regjistrua më 8 janar në pikën e kalimit kufitar të Morinës, ndërsa rasti tjetër ishte në Kakavijë, ku katër shtetas rumunë u arrestuan. Droga ishte e vendosur në vende të përshtatura në dy automjetet e pushimit. Sipas informacioneve droga dyshohet të jetë furnizuar nga shtetas shqiptar. Në të gjitha rastet, të arrestuarit kamufloheshin si turistë për të bërë të mundur transportin e drogës, ndërsa merrnin me qira kampera luksoze për ta transportuar atë.