Arma më e re e SHBA kundër raketave hipersonike të Kinës dhe Rusisë është ajri i nxehtë...Sipas të përditshmes Politico, departamenti amerikan i mbrojtjes po mendon të transferojë projektet e ‘tullumbaceve’ aerostatike nga shërbimet shkencore tek ata ushtarakë me objektivin e mbikqyrjes në kuota të larta. Në muajt e fundit, si Pekini ashtu edhe Moska kanë testuar armë hipersonike duke alarmuar gjithnjë e më shumë administratën amerikane. Si pasojë, kjo e fundit po tenton të marrë masa. Tullumbacet aerostatike, që fluturojnë në lartësi nga 18 deri në 27 kilometra, do ti shtoheshin kështu një vargu mjetesh të mbikqyrjes së mbrojtjes amerikane dhe mund të përdoren për të identifikuar raketat hipersonike. Për vite të tëra SHBA ka kryer teste me balonat aerostatike për të mbledhur informacione, për të mbështetur trupat në tokë dhe për të zgjidhur problemet e mundshme me satelitët. Por jo vetëm kaq. Këto platforma në kuotë të lartë, janë vështirësisht të gjurmueshëm dhe kanë shumë avantazhe për shkak të kapacitetit të tyre të manovrimit dhe fleksibilitetit. Sipas Politicos, në dy vitet e fundit pentagoni ka shpenzuar rreth 3.8 milionë dollarë në projektet e balonave në kuotë të lartë e madje parashikon të shpenzojë edhe mbi 27 milionë dollarë të tjerë për të vazhduar punën në këtë drejtim. Përdorimi i armëve hipersonike në konflikte të armatosura është tani më aktual se kurrë. Gjatë pushtimit të ukrainës, moska ka përdorur dy raketa të reja, kinzhal dhe Zircon. E para është e dedikuar për aviacionin dhe e dyta për marinën. Raketat janë shumë të sakta, të shpejta dhe të pagjurmueshme, dhe mund të godasin një shënjestër pa u neutralizuar nga mbrojtja kundërajrore.