Shtatë migrantë humbën jetën pas fundosjes së një varke rreth 5 milje nga Lampeduza në Itali. Mediat italiane raportojnë se mes viktimave janë katër gra, njëra prej të cilave ishte shtatzënë. Anija me të cilën po udhëtonin, u përmbys papritmas dhe shumica e njerëzvë përfunduan në det. Ekipet e shpëtimit gjetën 46 të mbijetuar. Sipas dëshmive të mbledhura, ka akoma 9 të tjerë të zhdukur. Rojet bregdetare dhe policia janë duke zhvilluar kërkime intensive në det. Përveç mbytjes së anijes, ishte edhe një natë zbarkimesh në Lampedusa. 256 migrantë mbërritën në ishull, duke filluar nga ora 03.30, me katër varka të ndryshme. Tri anije u shpëtuan në det të hapur, ndërsa e katërta me 6 tunizianë në bord, arriti të mbërrinte direkt në port rreth orës 07:00. Po dje ndodhën edhe 4 zbarkime në ishull me gjithsej 136 persona. 120 migrantët e parë, të kombësive të ndryshme, u pikasën rreth 14 milje në jug të ishullit. Ata ishin në një varkë me gjatësi 8 metra.