Një ortek i shkaktuar nga shembja e akullnajës më të madhe në Alpet italiane vrau të paktën gjashtë persona dhe plagosi tetë të tjerë, tha një zëdhënëse e shërbimeve emergjente. Akullnaja u shemb në malin Marmolada, më i larti në Dolomitet italiane, pranë fshatit Punta Rocca. Mediat e huaja raportojnë se, një ortek bore, akulli dhe shkëmbi goditi një shteg, duke lënë të paktën 6 persona të vdekur dhe 8 të tjerë të plagosur rëndë. Dy nga të personat e plagosur, u dërguan në spitalin në Belluno, një tjetër në gjendje më të rëndë u dërgua në Treviso dhe pesë në Trento, tha Michela Canova, nga shërbimi i emergjencave për agjencinë e lajmeve AFP.