Prokuroria e Tiranës ka vendosur sekuestrimin e pasurive të shtetasit Valter Duros i njohur edhe me dy identitete të tjera. Ai është arrestuar më parë në Itali për tentativë vrasjeje me paramendim dhe trafik ndërkombëtar droge. Hetimet kanë zbuluar se pasuritë e regjistruara në emër të tij dhe të nënës së tij nuk justifikohen nga burime të ligjshme të të ardhurave. Sipas Prokurorisë, këto pasuri dyshohet se janë përfituar nga aktiviteti kriminal në fushën e narkotikëve. Në kuadër të goditjes së krimit të organizuar, trafikimit dhe korrupsionit Prokuroria ka sekuestruar një apartament në Tiranë, një llogari bankare me shumën rreth një milion e njëqind mijë lekë. Një tjetër llogari bankare me shumën rreth një milion e gjashtëqind mijë lekë. Valter Duro është shpallur më parë në kërkim ndërkombëtar, ndërsa në vitin 2005 është arrestuar në Itali, gjë që anuloi urdhrin e kërkimit.