Një meteor që shpërtheu në qiellin e Brazilit mund të jetë vetëm vizitori i tretë ndëryjor i regjistruar ndonjëherë, thonë studiuesit. Vetëm dy objekte që kanë origjinën jashtë sistemit tonë diellor janë regjistruar më parë duke kaluar pranë Tokës, një në 2017 dhe një tjetër në 2019. Shumica e kometave dhe meteorëve të vëzhguar nga Toka janë pjesë e sistemit tonë diellor, dhe rrotullohen rreth Diellit. Por një shkëmb hapësinor që u shndërrua në një top zjarri mbi Rio Grande do Sul, Brazil, më 30 maj, mund të ketë ardhur nga 'jashtë sistemit diellor', bazuar në shpejtësinë dhe trajektoren e tij, njoftoi Meteor Watch Network (BRAMON) nga Brazili. BRAMON përcaktoi se topi i zjarrit ka origjinë ndëryjore pasi analizoi xhirimet nga dy kamera në Taquara, Rio Grande do Sul dhe Tangara, Santa Catarina, dhe se ai po udhëtonte me shpejtësi prej 230.700 km në orë. Shkëmbi hapësinor udhëtoi në një distancë prej 243.6 km për 3.8 sekonda, para se të zhdukej në lindje të Carlos Barbosa. "Meteorët shumë të shpejtë mund të kenë origjinë nga kometat, që vijnë nga skajet më të largëta të Sistemit Diellor, apo edhe nga jashtë tij. Nëse kjo konfirmohet, ai do të jetë meteori i parë ndëryjor i regjistruar nga BRAMON, që tregon se fenomeni është jashtëzakonisht i rrallë dhe se ia vlen të studiohet më thellë,” tha BRAMON.