Tirana mirëpret Festivalin Ndërkombëtar të Arkitekturës, ‘Bread & Heart Festival’, përgjatë tre ditëve, në datat 5 deri më 8 qershor. Edicioni i parë i festivalit nën moton “Bukë dhe zemër/ Sillni pak kripë ju lutem”, mikson mikëpritjen shqiptare me një ftesë për dialog të hapur dhe një mundësi ndërlidhje mes arkitektëve botërorë dhe atyre shqiptarë. Eventi, do të sjellë në Shqipëri studiot më prestigjioze të arkitekturës dhe arkitektët më të njohur nga e gjithë bota, do të zhvillohet në “Book Building” në qendër të Tiranës, në sheshin “Skënderbej”. Dita e hapur e festivalit do të jetë e ndarë në katër sesione, ku do të çelen ekspozita, do të zhvillohen konferenca dhe do ketë dhe performance artistike. Do të jenë mbi 150 grupe arkitektësh pjesëmarrës, të të ardhur nga vende të ndryshme të botës. Grupet e arkitektëve që do të jenë pjesë e festivalit, janë të angazhuar në projekte që po zhvillohen në të gjithë Shqipërinë.