Trafiku detar në Ngushticën e Hormuzit ka rënë ndjeshëm të dielën, pasi Irani njoftoi sërish mbylljen e këtij korridori strategjik, duke e lidhur vendimin me shkelje të marrëveshjes së përkohshme të paqes nga Izraeli dhe Shtetet e Bashkuara. Sipas të dhënave të kompanisë analitike Kpler, vetëm 5 anije kanë kaluar ngushticën të dielën, krahasuar me 26 anije një ditë më parë, një rënie e fortë që tregon ndikimin e menjëhershëm të tensioneve në këtë nyje kyçe të transportit global të naftës. Mes anijeve që kaluan ishin edhe tre supertankera të ngarkuar me rreth 2 milionë fuçi naftë dhe produkte nafte nga Arabia Saudite, ku një prej tyre ishte nisur drejt Japonisë. Megjithatë, të dhënat mund të mos përfshijnë anije që fikin transponderët gjatë lundrimit në Gjirin Persik. Reuters raportoi se Irani kishte lehtësuar bllokadën e ngushticës javën e kaluar, pas një marrëveshjeje me SHBA-në për zgjatjen e armëpushimit për 60 ditë, në funksion të negociatave të paqes. Por të shtunën, Garda Revolucionare Iraniane deklaroi sërish mbylljen e saj, në përgjigje të sulmeve izraelite në Liban.