Forcat ukrainase kontrollojnë vetëm një pjesë të vogël të rajonit lindor të Donjeckut dhe marrja e tij është ndër "objektivat kryesore" të Rusisë, u tha presidenti Vladimir Putin udhëheqësve ushtarakë. Putin tha se forcat ruse po zhvillonin një ofensivë përgjatë "të gjithë vijës së frontit" dhe e përshkroi përparimin e ushtrisë së tij si "pozitiv". Komentet e liderit rus vijnë ndërsa lufta në Ukrainë hyn në vitin e saj të pestë, me të dyja palët që hasin vështirësi për të arritur përparime të rëndësishme, ndërsa bisedimet e paqes të udhëhequra nga SHBA-ja kanë ngecur për shkak të çështjes së territoreve. Rusia ka kohë që kërkon kontrollin e plotë të rajonit të Donjeckut, të cilin e pretendon si territor të saj, dhe ka kërcënuar se do ta marrë atë me forcë nëse Ukraina nuk e dorëzon përmes negociatave. Ukraina, e cila ka nisur gjithashtu ofensivën e saj në rajonin e Donjeckut, e ka cilësuar kërkesën e Moskës si një kapitullim, i cili do ta linte vendin të pambrojtur ndaj një sulmi të ardhshëm rus. "Në përgjithësi, shoh një trend pozitiv në operacionet e grupimeve të trupave," u tha Putin udhëheqësve ushtarakë, në një video të publikuar në faqen e internetit të Kremlinit. "Pa dyshim, një nga objektivat kryesore mbetet 'çlirimi' i Republikës Popullore të Donjeckut," shtoi ai, duke përdorur terminologjinë e Kremlinit për këtë rajon. Sipas një analize të AFP-së, e cila bazohet në të dhënat e Institutit për Studimin e Luftës, trupat ukrainase arritën të bënin disa përparime kundër Rusisë në rajonin e Donjeckut gjatë muajit shtator. Përdorimi i gjerë i dronëve në vijën e frontit i ka bërë pothuajse të pamundura lëvizjet e shpejta dhe në shkallë të gjerë të trupave, duke penguar secilën palë të fitojë një avantazh të qartë në këtë luftë, e cila zgjat tashmë prej më shumë se katër vitesh e gjysmë.