Socialistët kanë mbledhur firmat për shkarkimin e presidentit Ilir Meta si pasojë e pretendimeve për shkelje të rënda kushtetuese. Në grupin aktual parlamentar të Partisë Socialsite bëjnë pjesë 75 deputetë nga të cilët vetëm 50 prej tyre kanë firmosur për nisjen e procedurave të shkarkimit për kreun e shtetit. Një prej atyre që nuk ka firmosur është Ditmir Bushati, që nuk u përfshi në listat e kandidatëve për deputetë në zgjedhjet e 25 Prillit. I renditur në vendin e 23 në listat e kandidatëve të Partisë Socialiste, Fatmir Xhafaj rrezikonte mandatin e deputetit, por si pasojë e numrit të lartë të votave arriti të thyente herësin dhe të futej në listë fituese. Emri i Xhafajt mungon në listën e deputetëve që firmosën për nisjen e procedurave të shkarkimit. Mimi Kodheli, Niko Peleshi dhe Ogerta Manastiliu janë politikanë të tjerë që nuk kanë mbështetur akuzat e ngritura për presidentin, që nuk ka të bëjë ndoshta me dëshirën e tyre, por me pamundësinë e kohës kur nisi mbledhja e firmave. Në dokumentin e kërkesës për nisjen e procedurave të shkarkimit të Metës, bazuar në shkeljet e tij të Kushtetutës bie në sy edhe mungesa e firmës së kryeministrit Edi Rama.