Akademia politike e Partisë Socialise e prezantuar fillimisht nga kryetari Edi Rama më 9 prill të këtij viti, po vijon trajnimet me të rinjtë të cilët duan të katapultohen në politikë dhe të mësojnë më shumë sa i takon historisë dhe ideve të partive progresiste dhe Partisë Socialiste të Shqipërisë. Krahas socialistëve Arta Dade, Erion Veliaj, Ulsi Manja, Igli Hasani, Elisa Spiropali, Ogerta Manastirliu; mentor në këtë akademi janë edhe figura ndërkombëtare. Një prej tyre, ish kryeministri italian Massimo D’Alema, të cilin kryeministri Edi Rama e ka konsideruar publikisht si mentor. Para pak muajsh, aktiviteti i D’Alemës në Shqipëri u cek nga televizioni italian Rai3, nën dyshime për aktivitet në fushën e lobimit. I pyetur nga gazetari Giorgio Mottola, Rama mohoi të ketë dijeni për çështje tregtare të D’Alemës në Shqipëri. Ish kryeministri britanik, Tony Blair, një tjetër figurë politike e afërt me kryeministrin Edi Rama ëshë gjithashtu mentor në akademinë politike. Një tjetër politikan me peshë, është edhe George Papandreou ish kryeministër grek, që gjithashtu jep leksione në këtë akademi. Sa i takon aspekteve ekonomike, mentor në këtë akademi është ekonomisti dhe akademiku nga Koreja e Jugut, Ha-Joon Chang. Rienergjizimi i Partisë Socialiste dhe afrimi i figurave të reja kanë qenë refren i kësaj faze ku ndodh kjo forcë politike. Më herët kryeministri paralajmëroi prezantimin në kongresin e 27 korrikut të një platforme të re për përzgjedhjen e deputetëve, bazuar në eksperiencën e zgjedhjeve të kaluara ku përmes platformës digjitale të quajtur “Deputeti që duam” disa të rinj u bënë pjesë e listave zgjedhore.