Një bazë ajrore në Alaska, skaji më veriperëndimor i Shteteve të Bashkuara, luan një rol thelbësor në sistemin amerikan të mbrojtjes nga sulmet me raketa. Bëhet fjalë për bazën Fort Greely, pranë rrethit Arktik si edhe bazën e forcave hapësinore ku radari më i sofistikuar amerikan gjurmon raketat më vdekjeprurëse në botë. Trupat atje, janë angazhuar në manovra dhe po stërviten për skenarin e një sulmi të mundshëm si psh një raketë balistike ndërkontinentale e lëshuar nga Koreja e veriut. Radari gjurmues hapësinor jep alarmin. Një skuadër në Bazën e Forcave Hapësinore në Alaska duhet të verifikojë të dhënat me radarin tokësor. “Jemi 300 persona në këtë bazë dhe mbrojmë 300 milionë njerëz”, thotë një pjestar i skuadrës. Radari tokësor i Forcave Hapësinore mund të gjurmojë objekte hapësinore në një distancë prej 5 mijë kilometrash, por imazhi nuk është i qartë, duke e bërë të vështirë përcaktimin se cila pjesë e lëshuar nga reketa ndërkontinentale është seksioni i raketës me lëndë shpërthyese, që përbën kërcënim. Për këtë arsye qeveria amerikane ndërtoi një mjet me kosto 1.5 miliardë dollarë për arsenalin e gjurmimit, radarin e ri me rreze të gjerë veprimi, LRDR.