Gazeta prestigjoze “The Guardian” ka publikuar një investigim që përqëndrohet në mënyrën se si liderë të ndryshëm në vendet e botës së tretë e përdorin rrjetin social Facebook për të manipuluar dhe sulmuar qytetarët e tyre. “The Guardian” disponon disa dokumente që tregojnë si Facebook i ka trajtuar 30 raste mashtrimi në rrjetet sociale të kryera në 25 vende të ndryshme, mes tyre edhe Shqipëria. Hetimi tregon se si Facebook ka lejuar abuzime të mëdha në platformën e saj që të ndodhin në vendet e varfëra, të vogla dhe joperëndimore në mënyrë që t’i jepet përparësi adresimit të abuzimeve që tërheqin vëmendjen e medias në shtete si SH.B.A. apo dhe vendet e tjera të pasura. Ndërkohë në vende si Iraku, Mongolia, Meksika apo edhe Shqipëria, si Afganistani apo Hondurasi, abuzimet në kuadrin politik vijojnë. “Në mënyrë që të manipulohet debati publik, në FB janë krijuar ato që njihen si “angazhime” të rreme që i referohen pëlqimeve, komenteve, shpërndarjeve dhe reagimeve nga llogari fallco në Facebook”, shkruan Guardian.