Babë e bir janë vënë në prangat e policisë mëngjesin e kësaj të shtune në Kashar, pasi kishin krijuar një skemë të mirëmenduar për kultivimin e kanabisit, duke krijuar atë që njihet si ‘shtëpi bari’. Fatmir dhe Hamdi Sulaj, përkatësisht 56 vjeç dhe 25 vjeç, ishin kujdesur në detaje që përveç kultivimit të lëndës narkotike, ta ruanin edhe me armë. Gjatë operacionit të koduar “Kashari”, të zhvilluar nga Komisariati i Policisë Nr. 6, , në brendësi të banesës së tyre, gjatë kontrollit të ushtruar në një serë bujqësore, u konstatuan të mbjella bimët narkotike Cannabis Sativa. Pas gjetjes së sasisë së lëndës narkotike, policia ushtroi kontroll të imtësishëm në banesën e familjes Sulaj, në të cilën u gjetën dhe sekuestruan edhe materiale të tjera të kundraligjshme. U gjetën edhe dy armë zjarri të llojit automatik dhe municion luftarak, të cilat dyshoheshin se përdoreshin nga autorët për të ruajtur bimën narkotike. Babë e bir tashmë do të vihen përpara drejtësisë pasi mbi to rëndojnë akuzat për veprat penale “Kultivim i bimëve narkotike” dhe “Mbajtja pa leje dhe prodhimi i armëve, armëve shpërthyese dhe i municionit” e kryer në bashkëpunim.