A do hapen negociatat për Shqipërinë? Kjo është pyetja që kërkon përgjigje, por së shumti duhet shoqëruar me plotësimin e kushteve të vendosur nga faktori ndërkombëtar. Komisioneri i Ballkanit Perendimor për zgjerim Oliver Varhelyi, ka nisur një tur në Ballkan, ku ditën e mërkurë do të mbërrijë në shqipëri. Në mbledhjen e fundit të Parlamentit Europian Varhelyi është shprehur se Shqipëria i ka plotësuar të gjitha kushtet dhe është gati për hapur konferencën e parë ndërqeveritare. Megjithatë, Shqipëria dhe Republika e Maqedonisë së Veriut do të ecin së bashku dhe duket se është pikërisht mosmarrëveshja e kësaj të fundit me Bullgarinë për fqinjësivë e mirë, e cila po penalizon negociatat edhe me vendin tonë. Është vlerësuar se Shqipëria ka bërë hapa pozitivë në të gjitha kushtet e vendosura nga Parlamenti Europian, ndërsa raportet e OSBE ODIHR për zgjedhjet e 25 prillit duket se do të jenë vendimtare. Një proces zgjedhor i lirë dhe demokratik si edhe frenimi dhe dënimi për fenomenin e shitblerjes së votës do të jetë vendimtar për nisjen e negociatave nën drejtimin e presidencës Portugeze.