Tërheqja e investitorëve të huaj është një faktor kyç për rimëkëmbjen ekonomike pas goditjes që mori ekonomia shqiptare nga koronavirusi. Në publikimin më të fundit të indeksit global të mundësive 2021 Shqipëria cilësohet si një ndër vendet me luhatjen më të madhe në harkun kohor të një viti. Kjo pasi për vitin 2021 vendi ynë renditet në vendin e 78 në botë për tërheqje të investimeve, duke humbur kështu 15 vende krahasuar me një vit më parë. Indeksi Global i Mundësive vlerëson tërheqjen e vendeve për investitorët ndërkombëtarë duke përdorur një kombinim të faktorëve ekonomikë, financiarë, institucionalë dhe rregullatorë Sipas treguesve të publikuar në këtë studim vihet re se regres më të madh kanë pësuar shërbimet financiare. Përkatësisht, Shqipëria renditet e 99-ta në shërbime financiare, e 85 në korniza institucionale dhe me përmirësim të lehtë në perceptimi i biznesit në të cilin renditet e 61-ta në botë. Në këndvështrim rajonal, Mali i Zi, Maqedonia dhe më pas Serbia kryesojnë në listë, të cilat kanë parë një performacë të mirë në tregues si perceptimi i biznesit dhe bazat ekonomikë.