Dubai është tronditur mbrëmjen e sotme, pak pas mesnate me orën lokale, pasi një shpërthim i fortë u dëgjua pranë një porti. Sipas të dhënave nga autoritetet atje, shpërthimi ka ndodhur në Portin e Jebel Ali në periferi të Dubait. Mediat lokale raportojnë se incidenti ndodhi rreth mesnatës dhe është parë e dëgjuar në të gjithë qytetin në Emiratet e Bashkuara Arabe, madje shpërthimi ka qenë aq i fuqishëm sa ka bërë që ndërtesat të lëkunden në një pjesë të qytetit afër portit. Ende nuk dihet se çfarë e ka shkaktuar shpërthimin, por mendohet se ka shpërthyer një anije cisternë e mbushur me karburant. Menjëherë pas shpërthimit policia dhe urgjenca mjekësore ka shkuar në vendngjarje. Në rrjete sociale janë publikuar video nga pamjet e frikshme të shpërthimit masiv. Në ajër fluturojnë copa metalike dhe mbetje që dyshohet se janë të anijes që kishte mbërritur nga Irani. Fatmirësisht raportohet se askush nuk ka vdekur dhe askush nuk është plagosur deri më tani nga shpërthimi në anijen e mallrave. Porti Jebel Ali në Dubai është një nga më të mëdhenjtë në botë dhe më i madhi në Lindjen e Mesme dhe shërben për ngarkesat ndërkontinentale mes Afrikës dhe Azisë. Ai konsiderohet si një “qendër hyrëse” dhe një “lidhje jetike në rrjetin tregtar global” që lidh tregjet lindore dhe perëndimore.