Kim jong un ka paralajmëruar banorët e vendit të izoluar se i pret një krizë e vështirë. Në fakt, raportet nga koreja e veriut tregojnë se vendi përballet me mungesa ushqimesh dhe paqëndrueshmëri ekonomike. Vendi komunist i mbylli kufijtë e tij në mënyrë hermetike që nga shfaqja e rasteve të para të koronavirusit, vitin e kaluar dhe deklaron se nuk ka asnjë infektim. Por kjo nuk rezulton shumë e besueshme. Lideri i Koresë së Veriut, Kim Jong Un, u bëri thirrje qytetarëve të tij që të përgatiten për një krizë “të vështirë”. Deklarata vjen pas paralajmërimeve të grupeve për të drejtat e njeriut se Koreja e Veriut përballet me mungesa të mëdha ushqimesh dhe paqëndrueshmëri ekonomike. Duke folur në një konferencë të partisë, Kim e krahasoi situatën me një uri famëkeqe vdekjeprurëse, në vitet 1990. Koreja e Veriut i ka mbyllur kufijtë e saj për shkak të pandemisë së koronavirusit. Kjo ka bërë që edhe tregtia e saj me Kinën të ngecë. Koreja e Veriut po ashtu përballet me sanksione ekonomike ndërkombëtare, për shkak të programit të saj bërthamor. Në një pranim të rrallë të vështirësive, Kim përmendi “Marsin e Mundishmëm”. Zyrtarët verikoreanë e përdorin këtë term për t’iu referuar urisë shkatërruese në vitet 1990, kur rënia e Bashkimit Sovjetik e ka lënë Korenë e Veriut pa ndihmë thelbësore. Rreth 3 milionë njerëz vlerësohet të kenë vdekur gjatë asaj periudhe. Muajin e kaluar, raportuesi i posaçëm i Kombeve të Bashkuara për të drejtat e njeriut në Korenë e Veriut, Tomas Ojea Quintana, ka thënë se “kriza e rëndë ushqimore” tashmë ka shkaktuar uri dhe kequshqyerje në vendin komunist.