Aktivistët e ndaluar nga flotilja e ndihmës Global Sumud me destinacion Gazën iu nënshtruan goditjeve elektrike dhe abuzimit fizik dhe psikologjik ndërsa ishin në paraburgim në izrael, sipas dëshmive të dokumentuara nga një organizatë izraelite për të drejtat e njeriut, Adalah. Organizata tha se të paktën tre aktivistë u shtruan në spital me lëndime të rënda, mes të cilëve dyshohet se është edhe shqiptari Baki Goxhaj, ndërsa dhjetëra të tjerë dyshohet se kanë brinjë të thyera dhe vështirësi në frymëmarrje, të lidhura me dhunën e ushtruar gjatë paraburgimit. Grupi tha se ekipi i tij ligjor mblodhi dëshmi që pretendojnë përdorim të përsëritur të goditjeve elektrike mbi të ndaluarit. Sipas rrëfimeve, të burgosurit u detyruan gjithashtu të merrnin pozicione të dhimbshme gjatë transferimit në Portin e Ashdodit, duke përfshirë ecjen të përkulur përpara dhe të gjunjëzuar për periudha të gjata. Adalah tha gjithashtu se autoritetet izraelite i hoqën me dhunë shamitë e kokës disa aktivisteve femra. Më parë, organizata akuzoi autoritetet izraelite se po ndjekin atë që e përshkroi si një "politikë kriminale abuzimi dhe poshtërimi" pasi pamjet e shpërndara nga Itamar Ben-Gvir tregonin të ndaluarit të gjunjëzuar me duart e lidhura ndërsa luhej himni kombëtar izraelit. Organizata tha se informacioni në lidhje me statusin ligjor, vendndodhjen dhe mirëqenien e të ndaluarve është kufizuar rëndë. Flotilja Global Sumud u nis nga Marmaris në Turqi javën e kaluar si pjesë e një përpjekjeje për të sfiduar bllokadën në Gaza, në fuqi që nga viti 2007. Sipas raportit, flotilja u ndalua nga forcat izraelite në ujërat ndërkombëtare dhe u transferua në Ashdod përpara procedurave të deportimit. Ministri i sigurisë kombëtare të ekstremit të djathtë të Izraelit, Itamar Ben-Gvir, ka shkaktuar një krizë diplomatike duke publikuar pamje të forcave të sigurisë izraelite që abuzojnë me aktivistët ndërkombëtarë që u ndaluan ndërsa përpiqeshin të lundronin drejt Gazës.