Gjermania do t'i japë fund blerjeve të qymyrit rus më 1 gusht dhe do të ndalojë blerjen e naftës ruse më 31 dhjetor, pasi vendi kërkon t'i japë shkëputet nga varësia Ruse. Rusia ka plotësuar më parë 40 për qind të nevojave për qymyr të Gjermanisë dhe 40 për qind të nevojave për naftë të saj, tha zëvendësministri i Financave Joerg Kukies në Forumin Energjetik të Sidneit, të organizuar nga qeveria australiane dhe Agjencia Ndërkombëtare e Energjisë. “Kushdo që e njeh historinë e naftësjellësit Druzhba, që ishte kthyer në një vegël të perandorisë sovjetike mbi Evropën Lindore, e kupton se të çlirosh veten nga kjo varësi nuk është një çështje e parëndësishme, por është një objektiv që ne do ta arrijmë brenda pak muajsh”, tha Kukies. Ai shtoi se sfida kryesore përpara do të jetë plotësimi i boshllëkut masiv që do të mbetet në furnizimet me gaz pasi Gjermania dhe i gjithë Bashkimi Evropian të heqin dorë nga furnizimet ruse, të cilat tani arrijnë në 158 miliardë metra kub në vit. Gjermania po lëviz me shpejtësi në zhvillimin e terminaleve të importit të gazit natyror të lëngshëm (LNG) për të ndihmuar në zbutjen e hendekut të furnizimit me gaz. Kukies tha se Shtetet e Bashkuara dhe Katari mund të furnizojnë së bashku Evropën me gaz të lëngshëm, por një hendek i madh do të mbetet ende.